羅素發威籃網反勝帝王

連續12年未能躋身季後賽的帝王,相信又要等下。佢哋尋日主場對籃網,雖然一度領先成28分,但最終居然倒輸121比123,籃網贏波後排東岸第7,躋身季後賽形勢樂觀,相反喺西岸排第9嘅帝王,同季後賽就愈走愈遠。

籃網今場功臣非羅素莫屬,佢打出個人生涯最高嘅44分。兩隊上半場拉鋸,帝王半場領先66比58。第3節出嚟帝王一度打出20比0攻勢,試過領先28分之多,但第4節籃網絕地反擊,羅素愈射愈有,單單尾節個人勁轟27分,比帝王全隊加埋仲要多,完場前1分鐘籃網成功反超前,終以兩分之微擊敗帝王終結3連敗,保持進入季後賽嘅希望。

同日湖人作客公鹿,安迪杜甘普同勒邦占士兩大巨星同時休戰,最終「紫衫軍團」又輸101比115,錄得4連敗,躋身季後賽機會近乎「0」,難怪名宿高比拜仁日前受訪時都話:「入季後賽,或者係明年。」

三分球「300+」居里睇齊夏登

另邊廂,已獲季後賽席位嘅勇士作客以117比107擊敗木狼,史提芬居里今場射入8個三分球,本賽季累積至303個,令佢與火箭的占士夏登睇齊,亦係歷史上首對能夠喺同一賽季造出「300+」三分球嘅球員。