古斯馬破紀錄新秀賽搶晒鏡
NBA明星周末頭盤新秀賽尋日上演，結果美國隊以161比144擊敗世界隊，效力湖人嘅古斯馬攻入35分當選MVP，仲打破名宿高比拜仁所保持嘅得分紀錄，不過球迷最關心嘅可能係當錫，呢位「超級新人王」堅有機會出戰聽朝上演嘅明星賽！
早前盛傳湖人計劃用古斯馬作為交易籌碼之一，交換塘鵝主將安東尼戴維斯，據悉古馬斯嬲到震，喺尋日新秀賽「化悲憤為力量」，首節打咗5分鐘就攻入14分，又爆樽又射入三分球。下半場佢出場時間唔多，全場依然錄得35分、6個籃板同2次助攻，打破原本由高比拜仁所保持，湖人球員喺新秀賽得到嘅31分得分紀錄，當選新秀賽MVP。另邊廂世界隊嘅施蒙斯有28分、5個籃板同6次助攻，依然拯救唔到球隊，同隊焦點球星當錫半場僅得3分，全場就有13分、5個籃板同9次助攻。
官方洩密 當錫有機打明星賽
雖然當錫新秀賽表現冇咩特別，但由於安東尼戴維斯喺明星賽前夕受傷，據NBA官方宣傳短片顯示，當錫極可能以替補身份出戰明星賽，宣傳短片咁話：「當錫嘅傳球魔術會喺明星賽上首次閃耀！」