夏登字母哥龍精虎猛
兩位今季MVP熱門尋日表現「龍精虎猛」，火箭占士夏登續顯強勢，作客帝王再做出「30+」，向名宿張伯倫紀錄進發；「字母哥」安迪杜甘普亦顯現出佢有資格爭逐MVP嘅能力，個人勁轟43分，帶領公鹿以148比129大炒巫師，成為今季最快達40勝嘅球隊，寫下里程碑。
未知係咪同交易日即將截止有關，帝王對火箭一仗兩隊首節手感都麻麻，「大鬍子」占士夏登首節11投5中得12分叫做唔錯，其後呢位MVP熱門開始發力，半場16射中9，三分球7投中6獲25分。全場埋單夏登攻入36分及6個籃板，助火箭贏127比101，錄得3連勝。夏登連續28場比賽「30+」，繼續向傳奇張伯倫嘅31場及65場兩個紀錄邁進。
公鹿挫巫師搶先40W
同日「字母哥」安迪杜甘普亦打出生涯最佳，「着晒火」交出43分、6籃板、4助攻及3搶截，即使巫師3人做出「20+」，亦阻止唔到公鹿大勝。公鹿除以40勝13負喺東岸繼續領先外，亦係今季最快實現40勝嘅球隊，可喜可賀。
