居里豬年唔使騰

曾趴地炮製經典入樽

史堤芬居里喺兩年前嘅明星賽，單人防守下睇住安迪杜甘普衝埋籃底，佢知道冇辦法阻止，索性趴喺地板上，仲用雙手護頭超搞笑咁扮等死，結果「字母哥」勁配合喺佢側邊飛過強力入樽，成為近年明星賽經典場面之一。

上年史堤芬居里成為西岸票王，佢再發揮搞笑本色，同傳媒講第1選擇揀安迪杜甘普做隊友，係因為唔想歷史重演。或者因為咁，「字母哥」好識做咁話，假如今年西岸票王勒邦占士唔揀「咖喱仔」，佢第1選擇必定係居里喎！

比賽方面，公鹿作客以113比94擊敗籃網，安迪杜甘普取得30分、15個籃板、9次助攻同3次封阻，徹底統治內線，包括上半場已經攻入20分，最後幾乎完成三雙，帶領公鹿連贏4場，證明佢的確有成為東岸票王嘅實力。