賽馬會青少年記者開學喇
第7屆香港賽馬會青少年體育記者培訓計劃正式展開！培訓計劃昨日假東華學院進行開學禮，邀得體育記者協會主席李漢源、導師麥耀邦、孔慶慇、李忠民等蒞臨。計劃負責人李德能在開學禮中，播放一段短片以勉勵一眾學員：「嘗試呀嘛！唔試點知自己得唔得？」
是次計劃獲得150人報名，透過面試及遴選，從中挑選了41位年輕人，進行為期半年的專業培訓。計劃負責人李德能表示，今年計劃以「Vision」（視野）和「Angle」（角度）作主題，期望一眾參與計劃的學員，能夠把眼光放得更遠更廣，全因：「未來嘅世界其實係屬於你，未來世界係靠你哋去創造！」
加入足球裁判課題
計劃來到第7個年頭，有別於過往數屆，今屆課程加入了足球裁判課題，更邀得香港足球總會裁判經理張炎有前來分享，張炎有於開學禮上表示：「我哋希望透過你哋（體育記者）嘅工作，可以發掘到球證嘅另一面，原來球證唔係淨係吹完畀人鬧，其實仲有好多認可。」
圖／文：陳焌鏗