選手隊開操梁興傑︰想有得踢兼零封！
將以主隊身份出戰「通海金融賀歲盃2019」的賀歲盃選手隊，昨日假將軍澳訓練中心晨操，積極為大年初一（5日）展開的賽事備戰。
由於今、明兩日仍有「菁英盃」分組賽上演，致選手隊的第二課仍然未能齊人，卻無阻主帥奇雲邦特之雄心，在近個半鐘的操練中，不時肉緊地指導球員企位，以及在分隊賽時不斷高聲提示防守一方逼搶，態度非常認真。
球員方面同樣表現積極，大家都希望憑表現博取到「KB」的信任，在兩天賽事中獲派上陣。職業球員生涯才第二次出戰賀歲盃的門將「09」梁興傑就表示，十分期待今次賽事的到臨，他說：「新年新開始吖嘛！好希望可以喺今次賀歲盃上陣，初一定初三都無問題，有得守同唔失波就得喇！我呢個月（2月26日）就結婚，進入人生另一個階段；我亦啱啱完咗C License（即亞洲足協C級教練牌照），未知合唔合格，但可以嘅話我都會繼續考上去。」
佐迪費蘭度變隊友最開心
問及最欣賞選手隊中哪一位隊友，「09」不消考慮便答道：「梗係佐迪同費蘭度啦！佢兩個真係好好波，射術又好，我都唔記得畀佢哋射入過幾多次，所以啱啱嗰場『菁英盃』贏到佢哋，我都好開心。今次做隊友，都希望可以喺佢哋身上學到嘢。」「09」補充謂希望熱愛本地波的球迷朋友，可以買飛入場支持今次賀歲盃，並祝願各位球迷朋友年行大運、身體健康。