傑志和富大埔決賽再碰頭 藍綠爭霸經驗活力比高低

雙方昨日出席賽前記者會，「藍綠」兩軍先禮後兵，「藍鳥」主教練朱志光表示對手已擁有一定決賽經驗，寄語球員切勿掉以輕心，至於「綠戰士」主帥李志堅則希望球隊可以把握年輕有活力的優勢，擊敗宿敵奪冠。

對於傑志之前3次於決賽對和富大埔，均能以1球小勝捧盃，主教練朱志光認為盃賽較容易出現變數，並提醒球員要小心應付︰「始終一場過嘅盃賽，無論喺90分鐘或踢到加時，變化都可以好大，所以唔可以攞之前嘅成績作準。雖然對手熟口熟面，但佢哋呢兩年進步咗，亦有足夠嘅決賽經驗。我哋係贏過佢，不過佢哋無論舊年定今年嘅社區盃，都踢得好好，所以球隊上下都要擺啲心機去應付呢場比賽。」至於上仗因與華杜斯碰撞感暈眩退下火線的黃洋，雖然經腦掃描後證實無大礙，但以安全起見會讓他休息。

黃威：希望贏番次

和富大埔繼早前3次盃賽對傑志均輸波後，去年10月聯賽在半場落後兩球下，連入兩球逼和對手，對於今次的「藍綠對決」，主教練李志堅希望球隊憑活力爭勝︰「我哋再一次入到決賽當然開心，雖然對手都係傑志，係一支好強橫嘅班霸，但我哋唔會諗太多，無論對手係邊隊，每場比賽都以一個好有決心嘅心態應付。根據呢兩年同傑志好多次嘅交手，我諗經驗會係佢哋嘅優勢，我哋嘅優勢就係比較年輕同有活力。」

至於和富大埔隊長黃威就揚言：「今季希望贏番佢哋一次，我都唔會因為3次決賽輸畀傑志而失信心，反而喺呢幾場波學到嘢。決賽失利係成長一部分，經過呢3場嘅成長，令到自己同球隊有足夠經驗去同傑志分高下！」他續說：「始終踢決賽係一場過，經驗好緊要，喺膠着、緊張情況下，點樣發揮自己同球隊嘅能力好重要，所以呢3場波我喺呢方面學到嘢。」

早啲入場換紀念匙扣

今屆賽事冠軍將獲得15萬元獎金，亞軍獎金5萬元，決賽將設由傳媒投票選出的決賽最佳球員獎項，得獎球員可獲1萬元獎金，另外首2千名入場球迷可憑決賽當日門券，到場內指定地點換取高級組銀牌決賽紀念匙扣。