合轟41球三分勇士推翻帝王
昨晨NBA勇士作客以127比123推翻帝王，史堤芬居里瘋狂攻入42分，包括射入10個三分球，而且兩隊夾埋射入咗41個三分波，癲咗咁上演「三分大賽」勁破聯盟紀錄。
史堤芬居里喺第1節已搵到手感，雖然佢喺第4節模仿占士夏登嘅雙重後撤步，被球證吹走步後唔忿氣，用手指做出13手勢代表夏登都係咁射，但佢跟住收拾心情再入兩個三分球，結果全場取得42分、5個籃板同2次助攻，帶領勇士重響勝鼓。
咖喱仔累積2,277球超越高華
除咗咖喱仔嘅三分球20投10中，杜蘭特有29分、5個籃板同8次助攻，射入7球三分，奇利湯臣有20分、包括入6個三分波，加上帝王全隊射入20個，最後雙方入咗41個三分，打破上季騎士對木狼創出嘅40個三分球聯盟紀錄。
唔只咁，史堤芬居里職業生涯累積2,277球三分波，超越高華（2,272球）進佔史上三分射手第4位，有機會喺緊接勇士對紐約人嘅比賽，騎過埋泰利嘅2,282，升上歷史第3位，不過佢要追到米拿嘅2,560個，同埋雷阿倫嘅2,973個，仲要繼續努力喇！