韋迪以小Block大救唔番熱火
邁阿密熱火球星韋迪已經36歲，喺球隊亦退居後備角色，可惜中鋒韋西迪等新世代球星似乎撐唔住。熱火昨於常規賽主場以90比105不敵魔術，縱使6呎4吋高嘅韋迪精彩「封阻」魔術7呎中鋒班巴，遺憾佢「Block」晒老命都阻止唔到熱火連勝斷纜，喺東岸只排第10位。
熱火今場半場領先50比46，不過第3節兵敗如山倒，魔術呢一節狂勝30比12奠定勝局，今場有12分、9籃板同3次封阻嘅熱火主力中鋒韋西迪整個第4節都冇份落場，完場前更嬲爆爆提早返更衣室作無聲抗議。其實韋西迪之前已經試過「發脾氣」，不過熱火教練史普斯達賽後想淡化事件：「或者佢覺得極度失望，就好似其他隊友一樣。」
封阻魔術7呎中鋒投籃
熱火今場敗仗最大亮點，相信就係「閃電俠」韋迪喺第4節封阻魔術7呎中鋒班巴嘅投射。統計顯示，身高只得6呎4吋嘅韋迪，ＮＢＡ生涯至少47次Block走身高7呎或以上球員投籃，「受害者」包括伊高斯卡斯、布克盧比斯同加素等著名「巨人」，成為ＮＢＡ史上「以小Block大」紀錄保持者。