顧家好男人 獎項唔重要 施丹：最愛角色做爸爸

雖然已經掛靴超過10年，不過明眼人都睇得出施丹身形依然好弗，而且一舉手一投足，瀟灑程度都同佢當年喺場上嘅英姿有得揮。球員時代嘅佢憑住精湛球技，帶領球會同國家隊成功斬獲大大小小各種獎項，其中最風光嘅，肯定係1998年同法國國家隊喺世盃封王，咁啱法國喺新一屆世盃夠晒爭氣，成功幫助「高盧雞」勇奪第二座世盃，施丹自己就十分睇好呢一班球員：「佢哋今次捧起世盃肯定引起關注，我認為其中好多球員，甚至有機會進一步贏埋金球獎。」

教波重點：傳授畢生所學

施丹好波就係人都知，不過估唔到原來佢教波都一樣掂，首次執教一線球隊，就帶領皇家馬德里3奪歐聯冠軍寶座，不過獎項對施丹嚟講似乎唔係佢做教練最關心嘅一環：「好多人都因為呢啲榮譽，而覺得我係一位好教練。不過對我嚟講，做教練最重要嘅，反而係點樣諗計將我畢生所學，傳授畀我嘅球員，同埋點樣同球員保持一個良好嘅關係。」

法國球王嘅中文字寫得好工整。	盡力滿足球迷簽名要求。	遊赤柱同小球迷合照。

足球之外，球王施丹其實都係一位非常顧家嘅「好男人」，今次嚟香港，佢就全程帶住老婆華諾妮姬喺身邊，而作為4名子女嘅爸爸，施丹話自己最睇重嘅肯定係家庭：「如果要我揀，比起球員同教練，我最喜歡的角色反而係做爸爸，皆因我認為一切成功嘅背後，家庭永遠都是最重要，無可替代。」

被赤柱市民野生捕獲

施丹日前先後到訪上海、杭州、北京同廣州，除出席運動品牌宣傳活動外，仲到西湖遊船、品嘗頂級龍井，蹲喺街頭睇中國大媽打麻雀，同遊覽萬里長城。施丹尋日嚟到行程壓軸一站香港，更喺尖沙咀店舖用書法寫出「足智多謀」四字，完美契合其傳奇中場大師身份以及高明多變的戰術思路。

盡情放假唔答未來去向

施丹對香港之行充滿期特，朝早更被球迷喺赤柱市集「野生捕獲」，在社交網站出現唔少同球王合照嘅「戰利品」：「香港係行程最後一站，所以我有較多時間周圍逛逛，或者會去郊外行山、山頂遊玩、參觀旅遊勝地等等。」至於外界盛傳施丹或將執教曼聯或拜仁慕尼黑，當主持問及去向，施丹明顯仍處於「度假mode」：「我一定會重拾教鞭，但唔係依家，我會好好享受休假，之後再定去向。」活動結束後，施丹繼續表現親民一面，特意為一眾球迷簽名同合照留念，難怪深受愛戴。

圖/文：林卓臻、許思彤