積蒙格連0分累勇士輸波

勇士昨晨喺NBA常規賽作客以86比107不敵火箭,爆出分裂鬧劇後首戰出現散檔式崩壞。雖然杜蘭特同積蒙格連表面上講和,但實際上積蒙格連夢遊球場,今場0得分,仲試過出現低級失誤浪費快攻機會,令人擔心佢同杜蘭特係口和心不和。

美國傳媒發現,兩大新聞人物喺練習中握手講和,但之前積蒙格連用粗口鬧杜蘭特,被罰內部停賽1場後,復出明顯心不在焉,正選上陣23分鐘只3次起手,全部炒晒之餘仲有5次失誤,包括組織快攻失手,最後交出0分、5個籃板同5次助攻差勁數據。

未能融入 安東尼畀火箭踢走

杜蘭特有20分、5個籃板同2次助攻,當中接應過積蒙格連嘅傳送入樽得分,不過「KD」15投得6中,得分效率唔高,加上奇利湯臣亦冇料到得10分同3個籃板,喺史堤芬居里因傷繼續缺陣下,最終勇士以大比數慘敗。

另一方面,火箭宣布放棄「甜瓜」安東尼,佢加盟後只係打咗10場,因為融入唔到戰術體系被踢走。不過火箭喺安東尼缺陣期間打得更好,今場占士夏登有27分、3個籃板同3次助攻,包括第3節獨取12分,帶領火箭完成3連勝反彈。