港超周六好波連場
「中銀人壽香港超級聯賽」今午上演兩場好戲，頭場下午2時30分假將軍澳運動場上演，由理文火併夢想FC；至於尾場「矛盾對決」由目前聯賽入球最多的香港飛馬，下午5時30分於旺角大球場迎戰失球最少的冠忠南區，兩仗主客雙方開季成績接近，料會掀起惡鬥。
利矛香港飛馬撼鋼盾冠忠南區
香港飛馬上仗聯賽作客凱景，兩度落後下以6比2反勝，主教練陳浩然提醒球員，面對擅於防守的冠忠南區，球隊已再沒有犯錯空間︰「上場初段防守犯錯較多，畀到大家經驗，情況唔算太壞，因為嗰場波有能力追番，但對同級隊伍或者強隊，相對就比較困難，所以我要求球隊防守上減少犯錯。南區防守力睇聯賽榜就知，只係失4球，我哋暫時喺聯賽入得最多波，今場對南區只要做好防守，我對球隊攻擊力唔太擔心，不過所指嘅防守唔係講緊防線嗰4個，而係球隊整體去守，例如前線球員點樣回後幫手協防。」
鄭兆聰：着重攻守平衡
聯賽首4仗皆勝的冠忠南區，近兩仗在聯賽及高級組銀牌同樣於不乏攻勢下落敗，主帥鄭兆聰坦言對球隊在銀牌賽出局感失望，卻亦勉勵球員盡快收拾心情︰「足球未必有邏輯，打得好唔一定贏，打得唔好亦未必輸，依家只可以忘記上場波向前望，希望可以踢番場好波之餘又贏波。」
鄭兆聰透露，狄卡奧有望於今仗復出，並寄望球隊在應付具有攻力的飛馬，能夠先專注做好防守︰「一支球隊如果要成績好，就要喺攻守上攞到平衡。我哋近年防守都好平穩，雖然唔係聯賽入波最多嘅一隊，但火力都唔差過任何一隊。我哋知道對手攻擊力好勁，所以防守會花多啲心機準備，嘗試製造反擊攻勢，畢竟對手用波能力較強。」
理文夢想FC拋開包袱鬥膽大
主場出擊的理文近況一般，自9月底擊敗凱景後，聯賽及銀牌均敗陣而回，主教練陳曉明認為壓力影響球員表現：「球員比賽時有無形嘅壓力，所以比賽前嘅練習都比較輕鬆，希望佢哋放鬆番，發揮出自己應有水準。上兩場雖然拚搏，始終表現仲係有啲拘謹，希望佢哋今場可以調整到。」
他又指球隊防守已有進步：「面對緊信心問題，之前兩場退得比較後、偏向防守，依家防守有改善，希望今場可以喺進攻做得好啲。」今場兩軍均有不少年輕球員，「曉明Sir」期望以經驗取勝：「夢想同我哋情況相似，但我哋嘅球員比較早出道，希望佢哋面對差唔多年紀，又或者細過自己嘅對手時，可以再放膽啲！」
「愈拘謹愈做唔到嘢」
今季於聯賽尚未敲響勝鼓的夢想FC，上仗在高級組銀牌8強戰對傑志，下半場落後兩球並踢少1人下，由馬高斯將比數拉近，最終以1比2僅敗。主教練梁志榮表示對球隊演出感滿意，並希望他們能將表現延續下去︰「上場波大家都有啲信心，紀律上都做得好好。嚟緊呢場都好睇球員嘅心態同埋戰術上嘅執行，希望可以比上場做得更加好，更加集中。我哋唔會畀太大壓力球員，有時啲波踢得好未必有回報，只不過踢得唔好就一定會輸，愈拘謹就愈做唔到嘢。」夢想門將屠俊翹因上仗領紅停賽，意味謝家榮有望復出把關。