吳凱威更強更堅

近年已成為頒獎台常客的傑志,最近5季合共奪得11個本地主要錦標,一眾球員及教練團當然勞苦功高,不過剛踏入加盟球隊5周年的總經理吳凱威(Wilson)同樣功不可沒。上季為「藍鳥」成功斟介國際級球星科蘭後,於球會同時管理不同部門的Wilson可謂身經百戰,面對球會基地早前受「山竹」颱風吹襲亦無畏無懼,統領幕後團隊作最佳支援。

負責管理賽馬會傑志中心、行政部、競賽部、人事部、公關及市場推廣部等眾多部門的吳凱威,這幾年看着球隊奪標無數,亦見證賽馬會傑志中心的成立,去季球隊參與亞冠賽事,並成功羅致前世界盃金球獎得主科蘭,對Wilson而言可謂既難忘又獲益良多。

Wilson說︰「初時同科蘭傾嗰陣,好似同其他球員咁傾,好多嘢都搞掂,但後尾好多嘢要再仔細傾,佢哋真係會好仔細咁將每一樣列出嚟,可能呢啲就係頂級球星同我哋平時簽嘅球員唔同嘅地方。我哋傾到一半,又突然有另一個代表出嚟同我哋傾,咁本來都差唔多七七八八,突然間又有個律師代表走出嚟,傾約多咗好多層,其實咁做係為咗保護個球員,不過我從中就學咗好多嘢,知道呢類頂級球星,(合約)裏面寫嘅嘢、睇嘅嘢同要嘅嘢,都真係唔同啲!」

基地水浸心痛小將冇波踢

上月經歷過颱風「山竹」吹襲及水浸之後,傑志訓練基地及辦公室隨即要停止運作,球會職員需要另覓地方租借作臨時辦公室,一隊最終亦改到位於將軍澳的賽馬會足總訓練中心操練,原來Wilson最擔心的,是會方提供足球訓練的小朋友︰「我當時諗最Hurt反而係班小朋友,因為佢哋好多Programme突然濃縮晒,啲小朋友啱啱開新球季,啱啱入選但訓練就少好多,全部由一個禮拜3節濃縮到得1節,如果個球場整好,我哋都想快啲畀番academy同埋青年軍喺度訓練番。我哋有個小學生計劃,邀請全香港嘅小學報呢個Programme,學生晏晝3點半放咗學就嚟呢度,衫褲襪同教練由我哋提供,教15至18個學生,一個禮拜兩課,但呢個計劃依家都停咗,因為我哋嗰段時間都搵唔到場,所以鋪完草之後會畀番佢哋用。」

傑仔因山竹請病假

颱風「山竹」為傑志帶來的影響不單止涉及職球員層面,連吉祥物「傑仔」也需要向主教練朱志光「請病假」!至於「傑仔」何時能夠復出,Wilson笑言被考起,不過他亦透露了訓練中心的維修進度︰「依家我哋個Office啱啱先搬晒啲傢俬走,訂咗新一批傢俬,希望可以喺11月尾返辦公室開工。至於草皮方面,今個禮拜會揭起啲草皮,睇吓底嗰層有冇壞到,如果冇的話就淨係換上面層草。如果壞埋,就真係成套系統都要換。

「假如唔使換就希望年尾可以用得番,因為船期都要成4至6個禮拜運過嚟,整草就需要3個禮拜左右,呢啲都係時間,之後用3個禮拜鋪草,再鋪番泥同沙上去。」

圖/文:何彥霆