冠忠南區東方龍獅榜首激鍊

「中銀人壽香港超級聯賽」今午爆發「榜首大戰」,由冠忠南區硬撼東方龍獅。兩軍今季未嘗一敗,主隊更是「全勝將軍」,欲知誰勝誰負,球迷除可入場支持愛隊,亦可透過on.cc東網直播欣賞這場激戰!(on.cc東網周六下午2時30分直播)

榜首冠忠南區今仗主場續移師旺角大球場舉行,賽前南區聯賽4連勝,主教練鄭兆聰(Ricky Sir)提醒球員不能自滿:「我哋一場一場計,因為依家喺第一位,唔代表你肯定拎冠軍,依家先10月,我唔會諗呢樣嘢住。雖然一起身見到球隊喺榜首好開心,但我都會同球員講要盡力踢好每場波!」

Ricky Sir「牛丸」鬥出招

由於射手高美斯、迪亞高分別因受傷、停賽未能上陣,「Ricky Sir」坦言:「一定有影響,但要對自己有信心,壓力喺對手度,呢兩個禮拜我哋準備得幾好,希望球隊攻守攞到平衡,特別係防守要做好啲。對手係強隊,呢場波我哋會被動啲,但被動都有被動嘅踢法。」防守中場狄卡奧上輪因傷缺陣,「Ricky Sir」透露此子近日已能完成整課訓練、進展良好,至於會否派他上陣則還需觀察。

作客的東方龍獅暫時錄得2勝1和,少踢一場下以7分排次席,今場榜首大戰,主教練陳婉婷認為贏波機會均等:「我相信對手4連勝後,信心、士氣一定會好,但我哋上場4比0贏夢想之後,信心都好好,我相信今場比賽係五五波。」

對手前線唔齊腳,「牛丸」警惕球員心態不能放鬆:「佢哋攻擊力一定會受削弱,但蘇沙同夏志明狀態都好好,所以我哋要做好自己先,唔可以有輕敵心態。」東方龍獅早前有7名球員入選香港隊,問及有否打亂部署時,「牛丸」認為影響不大:「備戰上唔多唔少會有影響,但慶幸我哋冇咩傷兵,變相將影響減到最低。」