英格蘭桌球公開賽話題性十足，64強先發生羅弘昊握手風波，32強就有傳奇奧蘇里雲，用7分14秒打出職業生涯第15次147滿分，狂風掃落葉贏阿倫泰萊4比0，衞冕之旅繼續強勢。火箭賽後表示，「當我打入第一隻紅波時，已覺得可打出147。但打到3、40度時，就開始感到隻手唔多妥，好似有條魚喺入面咁，皮膚不斷浮動。老實講，我直頭覺得自己打唔入最後個黑波！打出147只係代表贏出一局而已，依家離我最佳狀態仲爭好遠。」
