打少個照贏冠忠南區4連捷
昨日港超頭場前列大戰，冠忠南區移師旺角大球場主場延續強勁走勢，憑「子彈」夏志明補時6分鐘的絕殺球，1比0小勝和富大埔，南區開季4戰全勝續踞榜首。
迪亞高兩黃被逐
和富大埔開賽初段較為主動，李嘉耀及勞高先後起腳，惟未能命中目標，17分鐘到隊長黃威施放冷箭，亦被謝德謙接實。其後大埔繼續尋求機會，惜未能製造出具威脅的埋門，半場雙方互交白卷。換邊後大埔繼續施壓，57分鐘勞高禁區頂推過對手起腳中楣。1分鐘後南區傳來壞消息，迪亞高侵犯黃威領第二面黃牌被逐，大埔「人多打人少」下更放膽搶攻，63分鐘先有梁冠聰頭槌頂高，3分鐘後勞高熨射僅門前掠過。補時階段雙方「搏拳」，先有南區蘇沙窩利被曾文輝接實，隨後大埔大衛拉菲爾遠射被謝德謙撲出，歐陽耀冲欲補中又被謝德謙沒收。補時6分鐘終出現入球，夏志明高速推入禁區勁射遠柱破網，南區亦憑此絕殺球豪奪聯賽4連勝。
南區主教練鄭兆聰對迪亞高被逐有意見：「迪亞高畀人拉，我哋進攻緊，個波喺我哋嗰度，點解係我哋嘅球員兩黃一紅，有時球證要衡量呢啲嘢。」功臣夏志明稱：「大埔衝晒上去攻，我知道自己一定有機會，所以企定喺嗰個位，不過如果我傳畀蘇沙，佢都會入。」