方栢倫求突破重新起步
如果用「少年得志」來形容理文後衞方栢倫，相信沒有人會反對，皆因他早於20歲之齡便得到外流機會。不過天意弄人，效力球隊因人事變動、欠薪等問題而散班，「小志強」的合約還未完成便要離開。如今5年已過，當日黃毛小子逐漸成熟，更學會謙卑：「要記住唔好『一朝得志，語無倫次』，呢啲係大家都要知道，你唔好以為自己得咗，其實有排都未到頂！」
做好準備望再外闖
25歲的「栢倫」自覺踏入「突破之年」，今季決心轉投理文：「本身喺飛馬3年，雖然頭一年攞咗兩個冠軍，但覺得自己浮浮沉沉，第二年表現亦唔係咁好，上年表現好番少少，結果都係冇任何錦標，其實有啲失望。嚟到理文希望轉換新環境、重新起步，希望跟陳Sir（陳曉明）及達Sir（曾昭達）學嘢。」
「不甘」是「栢倫」向前推進的動力：「希望呢一年可以更進一步，裝備好自己再睇吓有冇機會出外。始終當年喺瀋陽踢得幾場，有啲唔甘心，自己唔係踢唔到，好多嗰時同我一齊踢後備嗰啲已經踢緊中超。只要準備好自己，其實香港球員同大陸球員唔係差咁遠。」
鹵莽行為吸取教訓
年初香港隊重奪省港盃，方栢倫更是踢足兩場，能從廣東新手上奪回錦標，令他大感鼓舞：「省港盃係一個好好嘅獎勵，之後都有內地球會搵我，但係我未完成學業，加上自覺未裝備夠，未係時候上去。」除捧盃外，方栢倫向鏡頭展示不雅手勢的一幕，相信許多球迷至今仍歷歷在目，對此「栢倫」坦言：「其實都有後悔，事關好多小朋友睇住，咁做會教壞佢哋，應該用其他方法宣洩不滿。但嗰刻冇諗咁多，因為我由自己底線推到去對方底線搏到角球，好多人都見到係角球，就連對面防守球員都走埋去追，但最後冇判到，我覺得好不忿！其實我唔知鏡頭影緊我，返到香港後好多人都Cap低嗰段嘢，仲加咗特效，惟有講句經一事長一智，話晒自己算係公眾人物，行為要檢點啲。」
或許你會認為「栢倫」性格衝動，但從另一面看，也是熱血的表現：「場外識我嘅人都知我成日亂講嘢，成個傻仔咁！但落到場就要做好自己，為達成目的去到盡，勇往直前，咩人都唔理，用一個忘我嘅態度去比賽，應該要係咁先啱！」
為學位邊踢邊讀 捱到喊都值
今個球季除了是「栢倫」效力理文的首季外，還是其大學生涯最後一年。全職讀書加上全職踢波並不易捱，連「栢倫」都大吐苦水：「呢幾年辛苦到『想死、想喊』！有時朝早8點半就要返學，之後去練波，練完波再返學，一直踩到夜晚，逢星期二、五又去埋校隊操練，休息時間完全唔夠，但我都好享受，覺得時間過得好快。你想要個學位就要付出，捱埋今年，出年就可以全心踢波。」
猶幸身邊人一直鼓勵，使「栢倫」不但在足球路上發展穩定，學業成績還能保持GPA過3：「女朋友同屋企人成日鼓勵我，叫我捱埋佢。我都想有個學位，因為親戚同朋友成日覺得我唔得，依家有個學位又踢到波，都算光宗耀祖。女朋友亦好肯教我，功課上有咩唔識就會問佢。」
方栢倫Profile
出生日期：1993年4月14日（25歲）
身高：1米82
體重：75kg
位置：左後衞
曾效力球隊：深水埗、橫濱FC（香港）、瀋陽中澤、YFC澳滌、香港飛馬
現效力球隊：理文
球衣號碼：14
圖/文：陳焌鏗、何彥霆