賽事緊湊水準提高

新一季嘅港超聯啱啱完成咗第一周賽事，10支球隊都已先後亮相，畀我嘅感覺係今季爭標形勢應該會好緊湊，而且幾場都係大手交易，入球過程亦非常緊張刺激，誰勝誰負真係要踢到完場一刻先知，希望各位球迷可以多啲入場支持，或者留意東網嘅賽事直播。

講番今季有好多球隊為咗爭取好成績而增強實力，除加強本地球員班底外，亦有好多具質素嘅新外援出現，直接令本地賽事嘅可觀性提高。其實相信足球圈所有人都希望香港足運可以持續向好，大家都努力堅持落去，希望愈嚟愈多人認識香港足球，好似上場東方龍獅對富力R&F咁，就連內地嘅球迷都可以睇到直播，聽講反應唔錯。早前，香港足球代表隊喺亞運亦有好好嘅表現，希望香港球員嘅努力，加上有心、有力嘅人士支持，可以令香港足運重現昔日光輝。