大坂直美封后振奮日本災民
美國網球公開賽女單決賽爆大冷！賽前被睇低一線嘅20歲日本小將大坂直美，以超強發揮，直落兩盤6比2及6比4擊敗前世界「一姐」S威廉絲，打破其7奪美網后冠夢，更成為網球史上首個日本球手奪得單打大滿貫冠軍，對正值飽受北海道地震災害困擾嘅日本國民來說，無疑可以大大振奮人心。
今屆決賽爆出可能係史上其中一次最爭議判決，細威被指喺第2盤開始，得到教練莫拉托魯嘅違規場邊指導，遭主球證卡路士拉莫斯扣分，引發雙方多幾次言語衝突，細威多次要求主球證道歉被拒，其後更直斥卡路士拉莫斯係「賊」，偷走佢得分而輸了關鍵一局，令佢第2盤由局數4比4平手，變成落後4比5。
轟總裁判玩「性別針對」
呢個時候，美網總裁判Brian Earley入場解釋規則，不過細威就連佢都鬧埋，聲稱因為自己性別就被針對。之後「細威」眼濕濕心情大受影響，期間甚至掟爛球拍，而大坂直美再順利贏埋第10局，以6比4贏埋次盤封后，更成首個贏得大滿貫單打冠軍嘅日本球手。
賽後頒獎禮上，球迷對球證同賽會對細威嘅判決極度不滿，瘋狂喝倒采，搞到冠軍嘅大坂直美都非常尷尬，仲一度落淚。不過，見慣大場面嘅細威，就絕對恩怨分明，即場呵番大坂直美，並強調唔關「小妹妹」事：「大坂直美打得好好，值得贏佢第一個大滿貫。我知你哋都好多不滿，但希望大家可以凝住最美好一刻，停止噓聲，並為直美送上最好嘅讚美！」至於大坂直美就好尷尬咁話：「我知所有人都係為莎蓮娜（S威廉絲）打氣，好對唔住個結局係咁，但能夠喺美網決賽同莎蓮娜交手，真係好夢幻。我好感恩可以同你打波，多謝！」
經濟雜誌預言年賺1.4億
大坂直美創造歷史，已經贏得380萬美元（約2,982萬港元）獎金，更有美國經濟雜誌預言，這位20歲球手今次一舉成名，年收入將會達到20億日圓（約1.4億港元）之巨，真係「錢」途似錦。其實大坂直美喺2016年就同日清食品簽約做代言人，今次決賽包括日清CEO安藤宏基在內嘅150名員工，就齊集喺公司東京總部睇Live，賽後安藤大讚大坂直美「給日本人一種精神動力」，有高層更爆料根據合約，會向大坂直美發放獎勵，但未有透露金額，日本網民就笑言，可能是終身免費食杯麵，而且數目或者多到足夠接濟身在北海道地震災區嘅直美外公添！
直美小資料
Naomi Osaka
父親︰李安納度（海地裔美國人）
母親︰大坂環（日本人）
出生︰1997年10月16日
身高︰1米80/體重：69公斤
個人殊榮︰2015年WTA最佳新人獎、2018美網女單冠軍