抗夢想FC強援 香港飛馬唔排除陳7打後
夢想FC今午5時30分會於青衣運動場與上季「三哥」香港飛馬拗手瓜。夢想FC今夏有不少人腳調動，外援方面簽下西班牙中場馬高斯，以及曾效力元朗的巴西前鋒希堅奴，球隊早前赴泰國進行季前集訓，與不同組別的當地球隊拍跳，分別錄得1勝1和2負戰績。主教練梁志榮表示，集訓期間可從球賽表現去研究出球隊最佳陣容︰「我哋喺集訓期間唔係太着緊個賽果，比較留意比賽過程，從而搵出年輕球員嘅最佳配搭。」「細榮Sir」又希望球隊能夠在場上做到部署︰「集訓得出唔錯效果，希望班後生落到場有好表現。」
馬高斯有料到 柏度加西亞嚴防
早前於泰國集訓錄得1勝2和不敗戰績的香港飛馬，今夏由柏度加西亞擔任主教練一職，這位29歲的新少帥表示，球隊自從於泰國集訓後漸入佳境，無論教練團抑或球員之間的認識亦有所加深︰「友賽表現愈嚟愈好，特別係最近對清邁嗰場係踢得最好嘅一場，不過我哋都唔可以忽視對手，佢哋簽入咗一啲出色年輕球員，馬高斯亦有一定質素，所以我哋唔可以掉以輕心。」
香港飛馬中堅羅斯因病缺操，問到「陳7」陳肇麒會否於今仗擔任中堅一職，柏度加西亞表示不排除這個可能性︰「陳肇麒係個好專業嘅球員，踢咗職業足球有成14、15年，無論踢前中後咩位置都可以勝任，會視乎情況以任何方式去協助球隊贏波。」