香港隊勁揪！昨午在印尼雅加達舉行的「亞運男子足球分組賽」A組賽事，香港隊憑藉將士用命，以3比1擊敗被視為同組實力最弱的老撾，順利全取3分，同晚中華台北同巴勒斯坦悶和0比0，更令港隊暫列小組第1，開個靚頭！
今場港隊主帥郭嘉諾，出乎意料之外未有將林嘉緯放在正選陣容當中，並安排了杜國榆、安永佳和鍾偉強，與陳俊樂組成中場線，前鋒則由鄭展龍夥拍佐迪攻堅，明顯希望與對方搶奪中場。
儘管港隊賽前獲外界看高一線，但開賽3分鐘便差點先失，當時老撾隊長哥哲倫左路發難後傳中，恩拿利後上禁區邊起腳，幸港隊門將袁皓俊有反應，橫身將皮球撲出底線。
站穩陣腳後，港隊開始控制戰局，並在20分鐘打開紀錄。當時陳俊樂於左路窄位傳中，皮球被敵衞閂出不遠，「泡泡龍」鄭展龍小禁區邊快腳一射入網成1比0。傾力反撲的老撾在37分鐘，「好波之人」哥哲倫禁區外施冷箭，卻再次成為袁皓俊的表演機會。3分鐘後，陳俊樂禁區內怒射入網，為港隊領先至2比0返回更衣室。
換邊再戰，列斯奧在50分鐘，差點便可射成3比0，惜其快射被老撾的布恩光，成功護空門。戰至60分鐘，鄭展龍拉傷倒地，而在其離場後，羅曉聰準備換入前，老撾把握良機，由高美迪拿追回一球。10分鐘後，如非袁皓俊「有料到」，擋出拿菲舒克之近射，港隊可能已被追平。到85分鐘，好波又好運的陳俊樂，於禁區內本欲扣過拿夏沙，皮球卻彈中該名守將後入網，最終港隊贏3比1旗開得勝。
賽後「嘉諾Sir」坦言雖對贏波感滿意，但就認為球隊在多方面，都有改善空間，他說：「好多球員都好緊張，開波頭段好拘謹，係到入咗波之後先踢得放啲，呢個情況特別要改善。」