尖咀街頭港迷同歡

法國擊敗克羅地亞，第二度捧走世界盃，一班喺尖沙咀酒吧區睇波嘅法國粉絲自然相當興奮，未完場已經開始載歌載舞，直至球證吹完場雞之後，更加盡興。有球迷拎住決賽射入金球嘅前鋒基利安麥巴比波衫通街走，見到有的士行過，更將波衫掟上司機位前嘅擋風玻璃，路過嘅私家車亦被球迷截停，有人喺車前跳舞，部分司機亦勁好心情，同球迷high five，場面超瘋狂！又有粉絲將未飲完嘅酒灑上天，眾人盡情歡呼，享受今屆世盃嘅最後一晚。