港超球隊R&F富力新任主教練楊正光，世盃決賽夜喺家中觀看直播，同太太Carol、囡囡Kaily、囝囝Cavan，齊齊穿上克羅地亞友人送贈之禮物───印上各人名字嘅克羅地亞打氣Tee，為愛隊打氣。
「格仔兵」屈居亞軍，昨日北上向新東家R&F富力報到嘅「光仔」表示，一對仔女為戰果感到傷心，佢同太太就未有太失落，畢竟戰情算精彩：「其實克羅地亞表現已經好好，慘在上半場失嗰兩個波，一個烏龍、一個12碼，好唔好彩。不過攞到亞軍都好難得，佢哋好多數據都比法國好，但都要讚吓法國，佢哋嘅入球把握力真係好好，奪冠實至名歸。」
至於賽前睇好法國嘅香港羽毛球一哥伍家朗（右上圖），賽後就大讚克羅地亞表現：「我覺得克羅地亞踢得好啲，攻勢同控球率都多啲，無奈上半場輸兩球畀法國，久攻不下仲要落後完上半場，出番嚟之後仍然多攻勢，不過法國心理上佔咗上風，第3球法國嘅反擊直情判咗克羅地亞死刑添。我覺得上半場克羅地亞個比列錫幾搶鏡，可惜入完波之後又輸番球12碼畀對方。」