雅加達亞運未開始就擺烏龍！男足項目原本已於日前進行分組抽籤，抽中同印尼、老撾、中華台北同組嘅港隊仲滿心歡喜，點知賽會眼大睇過龍，漏咗有份參賽嘅阿聯酋，結果梗係收到投訴啦！有指依家有兩個補鑊方案，首先係將阿聯酋放入其中一組，但試問有邊隊想遇上呢支具實力嘅球隊呢？所以好大機會重新抽籤，屆時港隊條籤仲係咪咁正真係好難講囉！