出名脾氣好嘅NBA勇士球星奇利湯臣憤怒了！正隨贊助商出席中國之旅嘅「China Klay」眼見朋友喺一場表演賽遭惡意侵犯，即時衝出球場向犯規的前CBA球員呂曉明嚴厲怒罵，並嬲到擲水樽洩憤，活動亦草草收場，宣告提前結束。
上次中國之旅因為「入樽」失手兼跌落地，被網友封為「China Klay」嘅奇利湯臣，今趟之行受到球迷熱情歡迎原本相當開心，不過日前去到山西財經大學球場出席活動，進行全場對抗表演賽期間卻出現小插曲，與奇利湯臣同行嘅一位朋友，因為一次飛身上籃時遭受前CBA球員呂曉明惡意犯規，慘失平衡由高點躂落地，即時辣着場邊嘅奇利湯臣及同行人士，衝出球場同呂曉明發生推撞，場面一度混亂，好彩經過調停後冇令事件惡化，而活動隨之腰斬，不過奇利湯臣離開球場時仍然嬲到怒擲水樽。
由於犯規動作足以毁掉球員生涯甚至有生命危險，網民都紛紛鬧爆呂曉明「丟臉丟到國際」，而打茅波嘅呂曉明亦作出公開道歉，話知道有機會同奇利湯臣交手時已經非常開心，特登調整狀態應戰，不過由於太過興奮所以場上動作出現失控，希望同奇利湯臣及其外國朋友，以至廣大球迷致歉。