「雙牙」好波帶旺茶記商場 球迷：捱眼瞓都抵！
尋日凌晨嘅葡萄牙對西班牙大戰，掀起今屆世盃首個高潮，旺角夜市亦非常熱鬧，其中有茶餐廳出現大批球迷聚腳睇波，茶記更特別安排闢出閣樓，安裝3部電視方便球迷睇波，兩隊激戰踢成3比3，球迷都話值得捱眼瞓。「茶記」睇波相對酒吧夜市消費較平，每位收50元，另附設啤酒及花生等小食。球迷黃先生話，專程出來觀戰捧C朗場：「輸贏唔重要，最緊要有好波睇！」
至於每逢世盃都會搞睇波Party的觀塘apm商場，由上周五晚到周六凌晨就聚集咗百多名球迷，直落看埋重頭戲葡萄牙對西班牙嘅「雙牙會」，先心滿意足離去。球迷成晚坐地下欣賞呢場「入球騷」，一有入球就興奮大叫，情緒高漲氣氛熱爆。其中一位球迷KAKA表示，放工就第一時間到場霸位，貪呢度氣氛好夠熱鬧。