玩集圖冊認識世盃球星 嘉殷貼出女人的浪漫

常言道:「男人愛高達,女人唔明白!」正如男人都重視「童年回憶」,而在世界盃期間儲「畀你貼」球員集圖冊,更被視為「男人的浪漫」!不過,這些常被女朋友視為「眼中釘」的嘥錢玩意,卻成為Now TV世盃靚女主持嘉殷「女人的浪漫」,期望以此成為世盃秘笈,極速「認識」這班世盃球星,能夠在螢光幕前如數家珍地向各大球迷介紹他們點滴!

與男友齊齊儲「愛情結晶品」

網上近日有很多因男友儲世盃集圖冊,而與女友「開火」的貼文。大概集圖冊已連同波衫、模型等,已被女友標籤為嘥錢及公敵!不過,嘉殷卻反而將此變成「女人的浪漫」,與男友一起製作這「愛情結晶品」:「我本身都鍾意儲唇膏、化妝品,無理由咁唔公平我有得儲,但男朋友無得儲佢鍾意嘅嘢。雖然好多女友覺得集圖冊唔等使,但我反而認為總好過男朋友將啲錢使喺啲唔健康嘅地方啦!」

不過,嘉殷表示集圖冊絕非唔等使,反而有幫她在世盃時主持工作:「仲記得有次成班同事喺謝德謙屋企聚會,見佢拎住本集圖冊係咁貼,覺得呢件事好『治愈』!而我亦開始計劃自己儲一本,仲要規定自己喺貼上每個球員之前,都要做功課搵吓資料認識佢。咁相信當我集齊嘅時候,就可以增加唔少對球員認識!」

交換重複貼紙增進同事感情

就在集圖過程中,也為嘉殷帶來意外驚喜:「儲貼紙嘅過程令我認識更多平時無留意嘅球員,就好似俄羅斯有好多靚仔球員、墨西哥門將奧祖亞真係好似吳鎮宇、而尼日利亞及突尼西亞就有唔少特別球員嘅故事,都豐富咗我睇世界盃知識,依家做節目時睇到啲球員訪問,我都會開本集圖冊睇吓!」

除了「長知識」外,嘉殷也直言過程中與一班同事增進感情:「我初時仲天真到以為買兩、三盒貼紙就可以儲齊,但實在太睇少『重複』嘅威力!好彩嘅係成件事『朋友』係好緊要,我哋一班同事甚至開群組互通消息同幫助,真係好似『一家人』咁!」

不過,嘉殷坦言要更熟悉世界盃,當然由分組賽至決賽要一場不漏地觀看,所以記得要緊貼她有份主持的Now TV世盃直播節目,看看她的功課是否做得足!

圖、文:司徒子文

場地鳴謝:Kitroom Sports