撐港超聯連續4季睇東網
香港足球總會昨午召開「2017/18年度香港超級聯賽球會座談會第三次會議」，會後足總主席梁孔德宣布，「2018至19年度中銀人壽香港超級聯賽」的獨家網上直播權，將繼續由on.cc東網奪得。「梁主席」還透露由10隊競逐的新一個港超球季，預計於8月31日開鑼，希望球迷可以繼續多多支持！
昨日會後「梁主席」除向在場傳媒宣布on.cc東網連續4季成為港超聯獨家網上播放媒體外，還表示：「直播、聯賽贊助無變，全部一樣。盃賽贊助依家仲搵緊。」對於日前傑志入信投訴R&F富力非法接觸傑志球員丹尼一事，他認為需要時間了解：「等我哋處理，我哋了解多啲先再講。」
凱景元朗組青春班
至於新一季落實征戰港超聯的凱景，會籍持有人馮凱文對班費持樂觀態度：「依家都係等贊助商落實畀幾多金額我哋，最終班費幾多答實唔到住，但係都樂觀嘅。」他續指班費部分源自「有心人」：「我哋班費有一部分係嚟自拔萃舊生集資畀我哋，一班師兄支持一班師弟，都係好事嚟。」問及組軍情況，「馮Sir」稱：「組軍情況冇乜太大問題，大部分年輕球員都係由細跟我到大。依家再會搵啲有經驗嘅華人，外援方面都要視乎預算，我希望可以親身飛過外國搵，多數屬意巴西同西班牙球員，位置方面會係中堅、中場同埋前鋒。依家已經簽咗11、12個年輕球員，較為特別係當中有8、9個『拔萃仔』。」
曾因贊助問題一度差點選擇「自降」的元朗，會長王威信冀以年輕球員為主：「我哋組軍方針係超過7成球員，即係17至18個會係U23嘅球員，另外嗰6至7個會係外援，加埋個別有經驗嘅本地球員，希望藉着呢個平台可以扶植佢哋。」外援方面，他謂：「當然要雙方嘅，我哋啲外援都證明咗實力，友會對佢哋都有興趣，我哋都要睇下滿唔滿足到佢哋要求。」至於教練人選，王威信稱：「其實都有適合嘅人選，需要進一步落實，成事機會好高，我相信會係最適合嘅人選。」