火鍋店400蚊睇場波 歐聯決賽食肆搶錢

今屆歐聯決賽由於有利物浦同皇馬兩支超多香港fans嘅球隊對碰，氣氛一早就炒熱，唔少食肆乘機搵番筆，油麻地一間酒家推出歐聯任飲任食，平時10時後收費188蚊嘅任食火鍋，歐聯當日要收400蚊（圖），價錢炒高1倍有多，仲要提早預先畀錢訂枱。

雖然話係任食，但呢個歐聯邊爐套餐，2至3位凌晨1點先至安排入座，4位以上就凌晨零時安排入座，但食物只提供到3點，即是話得2至3個鐘食，但任飲就去到賽事完畢，如果加時射埋12碼就抵啲囉。

茶餐廳150元只包一杯飲品

一邊打邊爐一邊睇波真係香港人至愛，喺大角咀杉樹街一間通宵火鍋店，由於冇最低入場費，全場幾十張枱一早於兩星期前訂爆座。至於大埔鄉事會坊間24小時營業嘅茶餐廳，餐廳負責人表示，歐聯決賽當日睇波人頭收費150元，只包一杯飲品。真係歐聯夜！搶錢夜！