冠忠南區和富大埔有惡鬥
足總盃4強大戰今午爆「地區打吡」，冠忠南區於旺角大球場與和富大埔爭入決賽！上周聯賽不敵傑志而錯過爭奪前4排名的冠忠南區，全隊上下目標指向足總盃；和富大埔主帥李志堅亦表明任何能獲取來季亞協盃入場券的途徑均不會錯過，無論聯賽或足總盃都搏盡，兩隊各有所圖，惡鬥難免！（周六下午3時開賽）
上仗聯賽不敵傑志令冠忠南區未能爭入前4，主教練鄭兆聰（Ricky）認為比數並未反映比賽狀況︰「我哋同傑志都要兼顧足總盃，大家都有啲顧慮，對住傑志呢啲球隊，你把握唔到機會就會有困難。追和1比1之後冇選擇去加強防守，因為我哋想喺聯賽爭第4就要贏，到最後入唔到第2球而輸1比4當然唔開心，令人覺得我哋防守有啲崩潰，球隊喺呢方面都有作出檢討，依家要忘記嗰場波，專心應付嚟緊賽事。」
Ricky Sir：知己知彼減低威脅
「Ricky Sir」同時強調冠忠南區已準備就緒︰「足總盃係我哋季尾一個好大嘅目標嚟，雖然大埔今季已經證明咗係一支好球隊，但我亦有信心我哋有機會，最重要係清楚對手嘅長處，從而減低威脅。」南區陣中並沒有傷兵，中場馬天尼斯則於上仗停賽後復出。
和富大埔如想來季參戰亞協盃，最直接方法便是奪得足總盃，假若不幸出局，便要寄望聯賽冠軍傑志同時捧走足總盃，而且大埔在聯賽煞科日擊敗香港飛馬，屆時便能以聯賽亞軍身份踢亞協盃。
李志堅讚球員保持鬥心
大埔主帥李志堅坦言球隊季尾難免有疲態，但稱讚球員鬥心夠強︰「打到咁耐球員都會疲累，不過有好多目標畀佢哋去充撐住。上場對富力領先兩球都有好大決心保住不失，呢樣嘢好緊要。我相信呢一刻班球員情緒好高漲，希望佢哋喺情緒同其他方面都控制得到，始終相比起南區同飛馬等球隊，佢哋嘅目標較清晰，我哋則要應付幾條戰線，希望球員唔好畀自己咁大包袱！」賽事90分鐘內打和將需加時，加時再和則互射12碼決勝。
文：何彥霆