東網連環直播季尾好波！
「中銀人壽香港超級聯賽」踢入最後直路，今午上演兩場直播好戲，頭場假主場大埔運動場出擊的和富大埔，想贏波爭第2，要問過上仗有王牌利安高復出的R&F富力（on.cc東網周日下午2時30分直播）；至於在青衣運動場上演的尾場賽事，夢想FC為求好頭好尾，誓踢爭氣波擊退理文（on.cc東網周日下午5時30分直播）。
和富大埔爭第2要問過R&F富力
正力爭來季亞協盃參賽資格的和富大埔主場火併R&F富力，雖然「綠戰士」目前同時要應付足總盃及菁英盃戰線，主帥李志堅仍揚言球隊今季餘下賽事「每場都當決賽踢」，絕對不容有失！
上仗於菁英盃4強以2比1擊敗香港飛馬的和富大埔，目前除有謝家強及馮慶燁受傷外，今仗亦有翟廷峯停賽，李志堅坦言上場興奮過後便要收拾心情繼續拚搏，但認為是「幸福的煩惱」︰「其實我哋除咗兩個盃要爭之外，仲有來季亞協盃資格，不過我認為係好事，去到季尾有嘢爭總好過冇嘢爭。」
「堅Sir」：每場都當決賽踢
假若在聯賽提早封王的傑志同時贏得足總盃，第2個亞協盃席位則會落在聯賽次席身上，排第3的大埔目前僅落後飛馬2分，兩隊將於聯賽煞科日碰頭，因此「綠戰士」只要餘下兩輪聯賽全勝便可升上次席，「堅Sir」強調今仗不容有失︰「其實真係冇空間犯錯，譬如我哋要同飛馬爭第2名，只要對方贏而自己失分，就已經冇得再追，所以依家每一場都係決賽，球隊上下都要有爭勝嘅信念。」
上周作客以3比1擊敗標準流浪的R&F富力，代理主教練吳耀星對於取得自接掌後的首勝，特別點名多謝球隊的康復教練，令早前受傷的王牌主力利安高趕及康復上陣，甚至踢足全場︰「球會喺呢一刻好需要一場勝利，爭取表現畀外界睇，所以呢場波好重要，好多謝球隊上下嘅努力同支持。利安高嘅恢復進度比我想像中快，我本身只預佢踢最後30分鐘，點知佢最終紮住踢都可以踢足全場。不過般連奴就喺之前場波拉傷肌肉，需要較長時間康復。」
對於今仗作客大埔，吳耀星給予對手不俗評價︰「我哋團隊對呢場比賽都好期待，因為知道對方有個唔錯嘅教練，佢哋亦有一啲年輕好球員，踢法並非傳統嘅英式足球，好有組織，所以好期待今次對壘。」
好頭梗要好尾！夢想FC激戰理文
夢想FC於尾場硬撼理文，兩隊今季已分別於菁英盃、足總盃及聯賽三度交手，理文獲2勝1負。雖然兩隊今季已與錦標無緣，但雙方教練均表示，希望球員於餘下賽事改善集中力問題，打出「爭氣波」！
梁志榮：冇降班壓力放開踢
上半季曾於聯賽升上第3的夢想FC，至今在所有本地賽事錄得11連敗，上仗出戰菁英盃曾一度追和傑志，但最終在比賽尾段多踢1人下，遭「藍鳥」以3比1擊敗。由於標準流浪上周未能擊敗R&F富力，篤定護級失敗，夢想FC主教練梁志榮表示不排除選用一些較少上陣的球員。
梁志榮說︰「其實班球員一直都想贏波，但好多時犯錯導致輸波，足球有時就係咁樣。球隊依家冇護級威脅，但就算連贏兩場，排名都唔會有好大上落，所以呢一兩場會畀啲年輕球員踢多少少，同時可以試陣，為下季部署。好似讀緊大學1年級嘅潘柏安，平時要返學未必練得足，都想畀啲機會佢攞吓港超經驗。不過球隊已經連輸11場，都希望班球員可以爭番啖氣贏波，等球季可以好頭好尾。」
理文上仗領先東方龍獅兩球下，最終遭對手絕殺，教練林慶麟再提醒球員比賽時要保持集中，否則就算取得入球也無法取勝︰「我哋最近呢幾場對東方龍獅同傑志都入到波，不過有時真係有啲大意嘅失誤，或者突然唔太集中，成日失啲唔應該失嘅波，變相喺比數上受到懲罰。希望球隊喺呢方面可以改善，無論對手係邊隊都好，都要好小心，只要一大意就會畀到對手機會射波。」