標準流浪護級 進擊冠忠南區
港超聯今午2時30分率先假深水埗運動場上演頭場賽事，由標準流浪迎戰冠忠南區。在聯賽僅得5分敬陪末席的流浪，近仗表現已有改善，惜始終未能贏波，為求護級今仗「救命」3分志在必得。至於對手冠忠南區位處中游有資格踢「風流波」，惟主教練鄭兆聰仍要求球員打醒十二分精神爭勝，將球隊連勝紀錄延續下去。
標準流浪上輪聯賽作客R&F富力，在一度領先下最終以2比2和局收場，之後菁英盃分組賽遇上「1哥」傑志，亦只以2比3僅敗，表現已有進步。儘管昨午排第9的夢想FC輸波，但流浪護級形勢依然被動，不過教練蘇洋則傾向將焦點集中在球員的表現，而非賽果方面，在最近兩周分別為球隊安排體能以及戰術上的訓練︰「其實最近幾場比賽都見到個訓練效果出嚟，入到幾球波，其實防守都唔算特別差，只係個別球員犯錯導致失波，希望喺呢場波可以喺防守上做好啲。」
鄭兆聰︰不能掉以輕心
另邊廂，冠忠南區走勢不俗，近2仗分別反勝理文及R&F富力，主教練鄭兆聰則提點球員要繼續保持專注，對今仗不能掉以輕心︰「其實都有同球員提過流浪呢幾場波嘅戰績，雖然佢哋係贏唔到，其實都踢得幾好，所以我哋唔可以放鬆，防守要專注，要有效率咁去製造攻勢，並化為入球。」鄭兆聰還透露前鋒伊利亞斯已復操，只是狀態未操弗，故今仗仍不會安排上陣。
