籃球場內好拍檔，潘志豪與方誠義場外一樣夠兄弟，與朋友攜手投資飲食業為未來人生做好規劃！今季「愛回家」重投永倫，兄弟倆無論場內場外都步伐一致，踏入運動員生涯「第4節」，除了繼續享受每一場賽事，為球隊搏盡外，場外亦開始搞搞新意思，邊學邊做為未來生活鋪路。

「其實係一個機緣巧合，我哋嘅共同朋友邀請一齊投資，當時我哋都考慮到，除咗打籃球之外，有冇其他方向可以嘗試，所以就應承咗，希望邊學邊做。」潘志豪說。即將踏入37歲，今季重返「黃金戰士」的阿豪雖然仍以正選身份上場，但始終踏入球員生涯尾聲，除了籃球亦希望可以找到另一條出路。選擇與阿Ga合作，皆因二人默契十足：「喺球場上夾就唔使多講，加上之前籃球學校都合作過，好少有摩擦，就算有都係我鬧佢多。」說到這裏，二人一起大笑出來，場內場外果然都夠晒合拍。

作為運動員，就算做生意，仍然離不開運動二字，身處河內道開設的運動酒吧，就是希望一班朋友可以有一個聚腳點，從充滿緊張刺激的賽場走出來，找到一處放鬆、聚會聊天的好地方。店內擺設亦充滿運動元素，有祖雲達斯、曼聯和戴歷羅斯的簽名波衫，多部電視機不停播放桌球、足球等賽事，阿Ga搞笑地說：「本來都想搞同籃球有關嘅酒吧，但NBA通常都係香港時間朝早打，你試吓NBA打夜晚，我一定全部朋友都嚟呢度睇。」

但首次接觸飲食業，由搵舖位到入貨等，都要親自落手落腳去做，但由足球「中途出家」轉打籃球的阿Ga，認為做生意和打籃球同樣困難：「如果依家講梗係打波容易，但若然啱啱開始打波，其實一樣都要學，就同依家一樣，慢慢學習去營運一間舖頭，由入貨到人流等等，自己都仲摸索緊。」

私底有如「大細路」一般貪玩，但說到這間舖頭，阿豪亦表現出在籃球場上專注認真的一面：「同籃球相比，依家有好多細節我哋都未接觸過，依家重新去學，要跟得好仔細，因為每一樣嘢都係成本，所以絕對唔係玩玩吓，學多樣嘢可以為未來好好打算。」雖然之後多了一間舖頭要打理，但兩位永倫球員都齊聲表示，絕對不會影響籃球場上的表現。隨着3月23日高級組銀牌賽事開鑼，阿Ga更為今季訂下新的目標：「今季同阿豪返咗嚟，加埋Bear（梁民熊），相信替補力量強咗，希望大家一齊打好每一仗，銀牌同聯賽都想攞冠軍！」

圖／文：王藝霖