陽光元朗士氣高唔怕３哥和富大埔
今日「中銀人壽香港超級聯賽」頭場假元朗大球場上演「新界打吡」，由士氣高昂的陽光元朗迎戰「3哥」和富大埔，雙方主帥賽前互派高帽，究竟邊隊高啲真係踢過先知！
賽前互笠高帽
陽光元朗近3場聯賽錄得2勝1和，主教練曾昭達認為球隊在護級壓力得到紓緩後，球員表現和隊內氣氛均有所改善︰「雖然上場對冠忠南區贏得驚險咗啲，但可以喺落後下追番兩球，表現都算唔錯，依家壓力相對少咗，士氣提升後球員表現都有進步。」對於元朗今仗有隊長法比奧累積5面黃牌停賽，「達Sir」希望球員能夠踢出拚勁︰「今場冇咗經驗豐富嘅法比奧鎮場，加上對手之前曾經連贏過5場，實力比我哋強，必定好難應付，希望班球員可以踢出活力，大家多跑一步踢場好波畀大家睇。」
上周於主場以1比4不敵傑志、5連勝告終的和富大埔，主教練李志堅坦言「藍鳥」該仗發揮好，加上球隊常規正選羅素比賽前夕落實離隊，大衞拉菲爾又受傷，在多種不利因素影響下致落敗。然而，「堅Sir」希望球員能夠振作，又強調今仗不易應付︰「球隊之前連贏5場，令大家上仗賽前有期望，雖然最後個比數感覺上比較難消化，但我希望球員可以盡快忘記佢，因為今場會幾難打，始終對手主場兩連勝，可以放鬆啲打，而我哋有壓力要搶分，希望球員可以重新振作。」
