賀歲盃入波夢想成真 劉智樂後起之瘦
標準流浪前鋒劉智樂於賀歲盃首度為港隊披甲即入波，賽後激動落淚令人難忘。「踢咗3年波，上星期喺菁英盃『開齋』，今次仲要代表港隊入波，真係好好彩！」屬狗的劉智樂踏入本命年，賀歲盃即以入球改變「命運」，更表示會向同屬身材瘦削的李斯特城球星占美華迪學習，證明「瘦，都可以踢前鋒！」
「係少少運氣加少少努力！」經歷夢幻一周後，劉智樂心情仍激動：「賽前有人話呢隊港隊連B隊都不如，但我哋落到場就搏到盡，多謝班隊友去到尾都冇放棄，輸緊波都咁積極。細個夢想就係喺旺角場比賽，我同自己講，今仗一定要入波，點知夢想成真。」中五會考畢業後做過電工及地盤，劉智樂3年前在麥花臣盃獲招重文賞識加盟黃大仙，展開職業生涯。當時月薪只得幾千，但「樂仔」依然享受：「唔止球員，相信好多人都想以興趣為自己職業。」24歲的「樂仔」坦言趁後生，就要「敢想」：「返工幾時都可以返，但踢波唔同，老咗跑唔到，就係跑唔到。」
向華迪學習前鋒之道
眼前的「樂仔」身形瘦削，在港超面對外援難免輸蝕。自爆「食極唔肥」的他有另一番見解，「華迪都好瘦，喺英超屬異數，好多人話佢入咁多波係『符碌』，但其實唔係，佢叻在唔會暴露自己嘅弱點，利用速度同走位入波。我嘅優點係靈活，不過就轉身慢啲，多謝招Sir好用心指導我，令我改善。」
感激媽咪全力支持
這位流浪前鋒目標是協助球隊護級：「有人話流浪刻薄，但試問有邊間球會畀咁多機會本地球員踢鋒線，又或者畀年輕球員踢足全場？大會邊有咁多機會？」捱足3年終於出頭，「樂仔」最想多謝「她」：「梗係媽咪啦！由細到大佢都好就我，畀我落街踢波，唔好似依家啲家長反對小朋友踢波、甚至玩。媽咪好鍾意睇我踢波同支持我，多謝佢！」
未來賽程
中銀人壽香港超級聯賽
2月24日（六）
冠忠南區 Vs 夢想ＦＣ
香港仔運動場
下午2時30分
$80、$30（特惠票）
東方龍獅 Vs 香港飛馬
旺角大球場
下午5時30分
$80、$30（特惠票）
中銀人壽香港超級聯賽
2月25日（日）
和富大埔 Vs 理 文
大埔運動場
下午2時30分
$80、$30（特惠票）
陽光元朗 Vs 標準流浪
元朗大球場
下午5時30分
$60、$20（特惠票）
中銀人壽香港超級聯賽
2月26日（一）
傑志 Vs R&F富力
旺角大球場
晚上8時
$150、$50（特惠票）
圖：何彥霆／文：余樂詩