票價創近10年新高 明星賽改制呃Like
2018年NBA明星賽香港時間周日上演技巧賽、三分賽同入樽賽，不過重頭戲始終係周一朝早9點爆發嘅明星賽正賽，今屆賽事引入隊長自選隊友模式呃Like，結果成功引爆話題，票價創出近10年新高，平均每張門票要1,959美金，等於15,000港紙！
今屆明星賽打破東岸對西岸嘅框框，東岸票王勒邦占士同西岸票王史堤芬居里，分別被任命為隊長打機式揀人，目的係拉近兩岸球星實力差距。消息話，大帝首選隊友係西岸嘅杜蘭特，咖喱仔首選隊友係東岸嘅安迪杜甘普，吸引唔少球迷搶飛。
事實上，著名票務網站StubHub嘅明星賽正賽價格，平均每張要1,959美元，當中近籃框嘅雙人票要29,510美金，接近23萬港紙夠買車，而且打破10年前同樣喺洛杉磯舉行，平均門票價格達到1,000美元嘅紀錄，仲大幅拋離MLB同NFL明星賽價位。
大帝話明打真軍
其實咁好正常，因為近年明星賽幾乎零防守，出現瘋狂射三分同拆你屋場面，搞到球迷覺得失去對抗性，所以今次勒邦占士認真揀隊友，畀到球迷好想知邊隊贏嘅感覺，大帝仲保證唔會揸流攤：「打好比賽係我哋嘅工作，呢啲係我哋欠球迷嘅。」