香港飛馬冠忠南區火花四濺
「中銀人壽香港超級聯賽」今日安排兩場激戰，當中尾場「2哥」香港飛馬坐鎮主場香港大球場迎戰冠忠南區，飛馬誓要全取3分收窄與榜首傑志的差距；冠忠南區增兵積極，先向東方龍獅借得中場陳肇鈞，再簽入巴西鋒將伊利亞斯，下半季爭佳績盡顯決心，兩軍碰頭必擦出燦爛火花！（東網on.cc周六下午5時30分直播）
早前重返港超聯加盟香港飛馬的塞爾維亞「Mr.Right」高美斯，上仗對陽光元朗即任正選，惟球隊在領先兩球下，於比賽尾段連失兩球遭對手逼和，不過傑志於該輪賽事亦踢和冠忠南區，飛馬在分數上未致被拋離，賽前落後傑志6分仍少賽1仗，榜首形勢仍見緊湊。
雖然上仗未能順利贏波，但主教練楊正光表示滿意球隊表現︰「上場踢咗84分鐘好波，球隊防線都做到減低對手威脅，可惜係我哋犯咗一啲錯誤而搞到和波分失，對賽果自然失望，不過整體表現都叫滿意。」
楊正光：應付南區反擊靠耐性
「光Sir」賽前指出，冠忠南區擅於防守及反擊，因此提醒球員需要耐性應付︰「南區同元朗踢法上有啲相似，表現有時會遇強愈強，喺防守同組織方面都做得好，所以我同球員強調，千祈唔好心急進攻，要先控制比賽節奏。」至於上仗因傷缺陣的艾華，楊正光要視乎其康復狀況，才決定他能否披甲。
冠忠南區上仗對傑志同樣在領先兩球下遭逼和，主教練鄭兆聰（Ricky）盛讚球隊近期演出不俗︰「其實我哋連續幾場波都打得好好，但有時都好視乎個際遇。我哋喺銀牌對東方龍獅有好多機會但把握唔到，之後對傑志少啲機會反而把握到，近幾場都好滿意球員表現，只要鬥志同組織方面可以繼續保持落去，好嘅戰果就自然會嚟，希望今仗有好成果。」至於傷兵方面，門將謝德謙仍有待觀察，或要再派李溢晉把關，然而夏志明上陣機會則不大。