決賽周世界最貴場館天幕慘遭空襲
世界盃球場遭遇「空襲」！聖彼得堡市副市長艾爾賓證實，世盃主要場地十字架體育場（Krestovsky Stadium）嘅天幕，慘遭鸕鶿襲擊，呢種識飛又識潛水捉魚嘅鳥類，用強大鳥喙啄穿球場天幕，艾爾賓批評有關機構對鳥類保育嘅工作做得唔夠，球場方面只好研究補救措施。
十字架體育場座落於聖彼得堡十字架島西部，耗資11億美元（約86億港元）興建，係世界上建造費用最貴嘅球場之一。呢座球場喺2017年啟用，可容68,134人，既係俄超班霸辛尼特嘅主場，又舉行過2017年洲際國家盃，明年世界盃決賽周期間將以聖彼得堡球場命名，到時會舉行7場比賽，包括摩洛哥對伊朗、俄羅斯對埃及、巴西對哥斯達黎加同尼日利亞對阿根廷4場分組賽，另有16強、準決賽同季軍戰。