公鹿掃雷多謝球證

NBA常規賽尋日上演雷霆主場對公鹿嘅大戰超激烈,到最後一刻公鹿先憑「字母哥」安迪杜甘普一個勁爆底線入樽,鎖定97比95勝局。完場後雷霆嘅安東尼極唔忿氣同球證抗議,原來佢話「字母哥」入樽前已經踩出底線,入球應該作廢!可惜球證堅持球例話明,只要當時球證冇吹雞,就連翻睇片段都唔得,雷霆今次輸得冤枉,相反「字母哥」再一次拯救公鹿威到盡!

今仗兩隊咬得勁緊,雷霆完場前由今場轟入40分嘅韋斯布克一嘢遠程三分炮追和95比95,滿以為要加時,點知鏡頭一轉就輪到安迪杜甘普前場右邊殺落底線避過雷霆侯迪斯嘅攔截,然後喺籃底入樽,將比數改寫成97比95完場。

火箭又輸 羞家5連敗

對於球證錯判,今場因傷缺陣嘅保羅佐治勁不滿,喺社交網留言:「嘩,冇走步同唔計出界呀?」但雷霆教練比利當路雲就冷靜咁話:「我有完全唔同睇法,聯賽會同球證會處理呢個問題,我反而關心點解上半場我哋打得咁差。」至於雷霆另一主將韋斯布克亦唔多介意:「場波都完咗,算啦!」雷霆今場曾經一度落後22分,不過尾段瘋狂反擊,可惜都要輸波收場。

同日其他賽事,兩支爭標熱門都輸波,衞冕嘅勇士主場以100比111倒灶不敵黃蜂。今場黃蜂有6人得分達雙位數,其中「超人」杜域侯活就轟入29分,兼有12個籃板同7個助攻,表現光芒四射。至於巫師亦以121比103主場砌低火箭,令後者錄得5連敗,認真濕滯!