白田Buffet老闆娘蝕錢賺「親情」 球員25蚊擦放題
要撐港超球員有好多方法，有時候一碟滿滿的「廿五蚊飯」，已讓他們感受到一份很大的支持！位於石硤尾白田商場內有間細小食店，每逢中午都會變成夢想FC的御用飯堂聚腳點，皆因老闆娘「梅姨」熱愛本地波，會讓球員放題式狂擦任食，都只收25蚊的離地價錢。對於這個專屬優惠，「梅姨」坦言雖會蝕本，但卻令自己多了一班球員做「屋企人」……其實只要做有意義的事，做些少蝕本生意又何妨？
走進這間不少港超球員形容為「白田Buffet」的食店，牆身都貼滿港超聯宣傳海報，為這平凡食店增添幾分特別！更特別的是每當午飯時間，一班夢想FC職球員陳偉豪、招重文、梁志榮、甚至CEO梁智駒都會聚集於此開飯！更更特別的是他們點餐是說：「唔該我要叉燒炒蛋、煎魚餅、豬扒、薯仔雞翼、同埋畀多個肉餅……凍檸茶少甜。」就像食放題般堆到「大滿足」的一碟！更更更特別的是這「Buffet」只收球員廿五蚊優惠價……這一切都是來自「梅姨」對港足的熱愛：「我本身都係本地波球迷，咁啱呢度又近佢哋練波嘅石硤尾球場，每次操練完咁辛苦，我就任佢哋食嚟鼓勵班球員囉！」
日日靚湯做冬團年煮好嘢
從年前的香港飛馬、上季的理文流浪，到今季的夢想FC，「梅姨」都一視同仁讓他們任食，亦從中賺到多份如親人般的情義：「班球員日日嚟食飯，久而久之就變咗屋企人咁。雖然依家飛馬同理文轉咗地方操練，但有啲都專登揸車過嚟食早餐探一探我，傾吓偈咁。我已經當咗佢哋係仔女咁，過時過節，我就準備定啲好嘢，好似做冬、團年就唔少得！」早前夢想FC迎戰陽光元朗的賽前，「梅姨」就預備好盆菜打氣，令球員們感受到被支持的溫暖。
「梅姨」透露一班港超球員雖然「神高神大」，但口味就像小朋友一樣：「啲細路鍾意食嘅雞翼、煎炸嘢佢哋就最鍾意！不過，做運動員要食得健康，我多數會準備啲蒸熟嘅嘢、同埋每日煲個靚湯畀佢哋！」
陳偉豪：特價飯人情味濃
對於「梅姨」的熱情款待，夢想FC隊長陳偉豪顯得感動：「其實我哋嚟呢度開飯並唔係因為個特價飯，而係呢度嘅人情味！老老實實，呢度唔怕我哋又嘈又坐得耐影響生意，畀到一個聚腳點我哋成隊波，可以多啲時間相處，對於團結球隊起到作用。況且老闆娘係一個真心球迷，上次球隊作客上廣州對R&F富力，佢都有北上支持，真心要多謝佢！」
未來賽程
12月24日（日） 高級組銀牌4強
傑志 Vs 陽光元朗
旺角大球場
下午3時
$80、$30（特惠票）
12月25日（一） 高級組銀牌4強
冠忠南區 Vs 東方龍獅
旺角大球場
下午3時
$80、$30（特惠票）
12月28日（四） 中銀人壽香港超級聯賽
東方龍獅 Vs 夢想FC
旺角大球場
晚上8時
$80、$30（特惠票）
圖/文：司徒子文