笑看住劏房撈兼職報道艾華頓：我唔悲情
由前季來港加盟灝天黃大仙開始，艾華頓就被定型為「悲情人物」，「捱平人工」、「兼職幫補」、「劏房屈蛇」等字句，幾乎都會在其專訪中出現，但原來「主人翁」艾華頓從不覺得自己有多慘、有多苦。「其實我從來都唔覺得自己慘，反而覺得好快樂！因為嚟香港令我得到做職業球員嘅機會，同識到一位好朋友。」新一季加盟陽光元朗的艾華頓，一臉滿足地道。
雖然因為「帕卡」襲港，令到陽光元朗成為4支尚未登場的港超聯球隊之一，但因為在季前熱身賽表現搶鏡，來自巴西的前鋒艾華頓未正式出場，已獲球迷視為該支地區球隊今夏的最佳收購。「好高興球迷咁歡迎我，我亦對能夠加盟元朗感到非常興奮！之前兩個球季，我曾經同元朗交過手，亦作客過元朗大球場，畀我嘅印象好深刻，呢支係一支好似大家庭嘅球隊，當時我就同自己講，如果有一日轉會，可以成為呢支『橙軍』嘅一分子都唔錯呀？」英文依然屬「有限公司」的艾華頓，透過「義務翻譯」法比奧表示。
「香港畀機會我踢職業」
未談及新季展望，先與艾華頓「回帶」談談他在許多人眼中的「悽慘歲月」。「可能好多人認為我頭兩季喺香港落班好慘，但我真係一啲都唔覺得。反而我好感恩，因為嚟香港之前，我連一次做職業球員嘅機會都冇。冇錯，頭半季因為一啲原因，我只能夠跟操，無法上陣，係有少少失落，但問題好快已經解決咗，我好享受喺灝天黃大仙展開我嘅職業球員生涯。」回想往事，艾華頓不禁流露甜笑。
感激伯樂「冇招重文冇我」
據消息透露，為灝天黃大仙上陣半季後，最少3間港超球會打艾華頓主意，但他卻一一婉拒，原因只為情與義，他說：「原來你都知道，係呀！有幾間球會喺嗰季之後，都話想我加盟佢哋，而且都開出令我好振奮嘅條件，但因為喺球季完結前，我已經同我嘅教練招重文達成咗協議，佢應承會盡最大努力同我繼續合作，所以我一直等佢嘅回覆，結果我哋一齊喺標準灝天度過咗一個球季。」艾華頓謂由來港一刻，已視招重文為「伯樂」，因為沒有他，艾華頓的名字未必會出現在港超聯中：「『文仔』一直好為我着想，為我爭取最好嘅條件，係一位無論做教練定朋友都好值得信任嘅人，冇佢冇我！」
新一季，艾華頓將會披起陽光元朗的戰衣，亦是他來港後首次與「文仔」分道揚鑣，可有為此擔心？「唔會啦！加盟元朗前，我哋傾過好多次，佢畀咗好多意見我，我會喺度努力爭取表現答謝『文仔』，唔想亦唔會令我呢位好教練、好朋友失望。」每次提及「文仔」，艾華頓總會露出招牌笑容。
圖/文：大頭