互射12碼狐狸險勝咸馬爭氣做英雄
英超亞洲盃頭場，「狐狸」李斯特城於法定時間同西布朗打成1比1，難得擔正嘅「狐狸」門神咸馬大踢爭氣波，喺互射12碼「突然死亡」 階段勇救險球做英雄，最終協助以總比數8比7擊敗西布朗，殺入決賽。
前季英超盟主「狐狸」李斯特城今仗有所保留，正選收起箭頭「華Dee」占美華迪及門神卡斯柏舒米高。相反西布朗除咗有隊長莊尼伊雲斯及積基李華摩亞等主力壓陣外，2名新兵前鋒「J洛」積洛迪古斯及守將希加斯亦有得擔正，仲趁「狐狸」未企穩陣腳，開波10分鐘即由「J洛」炮彈式勁射破網。
「突然死亡」救森菲特射門
李城失波後如夢初醒，逐漸搶回主動權，24分鐘岡崎慎司走入中路引開對方守衞，製造空位畀馬列斯帶波殺入禁區窄位射成1比1，去到完半場前仲換入「華Dee」加強攻力。易邊後李斯特城雖形勢佔優，但仍無法增添紀錄，最終法定時間各一言和，直接互射12碼分勝負，今次賽事採取全新嘅「ABBA」嘅互射12碼制度，頭5輪全部命中，要進行「突然死亡」，西布朗小將森菲特射得太正，畀今仗擔正嘅咸馬救出，協助「狐狸」射12碼贏7比6，總比數以8比7擊敗西布朗。
李斯特城領隊沙士比亞於賽後表示：「純粹以球員狀態而言，我對於大部分球員能夠獲得約45分鐘落場機會感滿意。今仗賽果兩隊均有機會獲勝，雙方互射12碼的對決也具質素，我十分慶幸球隊最後能夠進身決賽。」