由1998年轉為職業球手時的「神奇小子」，到現時手握3個排名賽冠軍的「Wonder爸」，香港桌球一哥傅家俊（Marco）不經不覺已踏入職業生涯第20個球季。20年當中Marco曾與多位世界頂級球手交戰，參加過無數大賽，無論贏或輸，Marco腦海中都留下不少難忘時刻，因此他的「20年之最」可謂幕幕精彩、驚喜連連！難怪要Marco總結這段充滿回憶的時光，他選擇用4個字去形容——「超額完成」。

「無諗過打20年，原本只係諗住打10年。」訪問前Marco正用桌球砌出「20」字樣，想不到這時他輕輕說了這句。原來Marco初時受亨特利影響，覺得30歲已是桌球手黃金期的終結，所以只為自己劃下10年界線，誰知一打便20年，因此他用「超額完成」去形容這段時光：「轉職業前定下唔少目標，例如排名、冠軍、要贏咩對手等。呢20年我嘅成績比預期高，自己亦得到好多，所以冇太多遺憾，呢段日子都過得好開心。」

要Marco從數以百計征戰過的賽事中選出最難忘的一次，本以為他會「揀唔落手」，誰知他毫不猶豫就說出答案，更「一輪嘴」將曲折離奇的經歷道出：「2016年世界桌球錦標賽令我最深刻，條頸痛到打唔到波、比賽中鬆銅嘴；8強打出最靚清枱、4強甩Tip，僅負世界一哥沙比；更試過發燒、外母亦喺超市畀輪椅轆過入醫院等，實在太多事發生。」其中「甩Tip事件」就令Marco最尷尬，見慣大場面的他也直言被考起：「我未試過甩Tip，唔清楚相關規例，加上有電視直播，就連球證幫我換Tip都出埋街，相信球證同電視台人員都勁尷尬！」

比賽時最難是Set「士碌架」、救波還是打147呢？經過廿年洗禮，Macro指其實係坐喺球員座位度睇對手打波，這原來亦是一門學問：「球手好多時輸波唔係輸喺枱上，而係輸喺座位上。球手或會被負面情緒影響發揮，所以我會調適呼吸，放鬆自己，集中精神諗跟住點樣打好每一球。」不過就算坐埋一邊，Marco亦笑指有位球手會令他覺得「輸得抵」：「個個球員都咁勁，其實我都唔係太想遇到，但係輸畀奧蘇里雲，佢都起碼打得好睇，我坐喺座位上都無咁悶，因為佢會好快解決我，唔使折磨我咁耐。」

20年間Marco亦遇上過低潮，但他表示自己性格夠善忘，很快就可以當冇事發生，重拾信心努力練波。他亦感謝自己的朋友及教練，助他渡過每次難關，才能成就今時今日，在世界桌球壇無人不曉的傅家俊。

1998：挾世青冠軍及世業冠軍之名轉打職業，參加首個職業賽即在格蘭披治賽淘汰奧蘇里雲等多名頂級高手殺入決賽，惜冠軍戰不敵李爾，屈居亞席，但已震驚世界球壇。

1999：獲4個排名賽正賽資格，包括首次參加世界錦標賽，並於同年當選世界職業桌球總會（WPBSA）最佳新秀及世界桌球總會（WSA）最佳年青球員。

2000：表現穩定，由當初的世界排名377位，急升至第35位。

2001-02：世界排名首度打入TOP16，一度升至第15位。惟表現不穩，在世界賽首圈出局，02年季尾世界排名更跌落27位。

2003：贏得躋身職業後首個冠軍，在職業聯賽（邀請賽）決賽打敗威廉斯奪冠，並成為首位贏得聯賽錦標賽的非英國球手。

2004-06：06年世錦賽連贏3位種子球員麥文紐斯、麥佳亞及杜赫迪，首次闖入4強，可惜以16比17僅負艾頓，無緣決賽。同年獲得球壇名宿基夫斯助拳，擔任教練做幕後軍師。

2007：贏得生涯首個排名賽冠軍！事隔9年後再次躋身格蘭披治賽決賽，擊敗奧蘇里雲贏得錦標。同年世界排名升上歷史新高的第14位。

2008-09：殺入全英賽決賽，2009年更為香港贏得東亞運動會金牌。

2010-2011：為香港出戰2010年亞運會贏丁俊暉奪金，隨後在大師賽與小丁合演中港對決，也是史上首次由中國人內訌，最後不敵小丁。

2012-14：於12年季初世界公開賽成功打出個人第二次147滿分，翌年躋身德國大師賽決賽，繼而又闖入國際錦標賽決賽，兼贏得澳洲公開賽冠軍，年終世界排名登上第6。

2015-17：15至16賽季殺入世錦賽4強，捧走直布羅陀公開賽錦標，上季更先後闖入全英賽、世界格蘭披治賽及大師賽4強，並於蘇格蘭公開賽擊敗希堅斯，捧走個人職業第3個排名賽冠軍。世界排名升上新高第5位！

圖/文：袁志浩