美國傳媒報道，今季先轉投勇士，協助球隊奪得NBA總冠軍嘅杜蘭特，總算一償多年「冠軍指環」心願，自己亦成為總決賽MVP，搞到佢留隊決心更加堅決。消息指杜蘭特為咗留隊，放棄要求得到3,550萬美元頂薪，答應再簽1份「1＋1」合約，下季年薪只得3,180萬美元，要等到2018年夏天，先再拎4年總值1.6億美元嘅肥約。
至於勇士主將「咖喱仔」史堤芬居里喺2013年簽咗份4年總值4,400萬美元嘅合同，幾乎全世界都覺得佢嘅人工太奀，有見及此，勇士老闆願意用5年總值2.05億美元合約留住佢，希望延續金州王朝，咁搞法，睇怕未來幾年NBA都會係勇士天下。