「Quickie」寸騎士冇料勇士勝利巡遊勁囂
勇士喺NBA總決賽以場數4比1掃低騎士後，香港時間星期五朝早舉行勝利巡遊，期間最搶鏡嘅，肯定係積蒙格連，佢着上自己諗出嚟、印上「Quickie」字樣加總冠軍獎盃圖案嘅T恤，狂寸騎士喺總決賽極速玩完冇料到呀！
其實「Quickie」意念係來自騎士主場贊助商Quicken Loans嘅Logo，積蒙格連咁話：「Q球場，就係嗰班友嘅主場名稱，我哋好快就搞掂佢哋，我唔會忘記，上年勒邦占士喺巡遊上着過『終結勇士』T恤，同埋嗰個3比1墓碑餅乾，我等咗呢刻好耐！」
其他勇士球員都玩得勁開心，史堤芬居里叼住雪茄當總冠軍獎盃係玩具咁玩，又幫隊友伊恩奇勒影低打筋斗捧盃片段。至於杜蘭特就不斷喺車頭同群眾打招呼互動，睇得出佢心情超靚！
