ＮＢＡ總決賽Game5於香港時間今晨9時開戰，騎士喺場數追成1比3後，球迷正期待佢哋再創奇迹，打出去年落後兩場下，後上奪總冠軍嘅好戲，不過根據ESPN籃球實力指數（BPI）分析，現時勇士奪得總冠軍嘅機會，依然超過99%，而且以4比1解決騎士嘅機會高達85%。另外，有傳媒向ＮＢＡ專家作出調查，當中85%覺得勇士會以4比1結束總決賽，4比2得7%、4比3得4%，認為騎士可以創造奇迹以4比3捧盃，只得4%咋！
另外，騎士今仗作客勇士前，教練路爾明確表明，好唔滿意球員喺比賽中成日笑騎騎，下令禁止再傾閒偈：「頭3場我哋太友善，大家不斷笑住傾偈，我唔鍾意咁，我哋嘅責任係贏波，唔係笑住同對手講嘢。既然對方痛擊我哋，騎士就要還擊，有乜嘢值得笑呢？所以，還擊對手、增加對抗，將佢哋前3場對我哋做過嘅嘢，還番晒畀勇士！」另一方面，勇士教練卡爾着上印住「超級惡棍」字樣嘅Ｔ恤出席賽前記者會，擺明要同對方鬥惡喎！