KD信心爆棚勢向騎士派蛋
勇士喺NBA總決賽以2比0場數領先騎士，奪冠形勢大好，周四早上Game3賽事開打前，勇士主將杜蘭特（KD）就豪言要「橫掃」奪冠！勇士於今季季後賽已經錄得14連勝，假如直落再贏2場，就可以創下季後賽16連勝贏總冠軍嘅神迹。曾於1975年跟隨勇士奪得總冠軍嘅奇里福雷爆料，勇士球員的確已訂下「派蛋奪冠」計劃：「我最近同杜蘭特傾過，佢話我知，真係好想完成全勝奪冠嘅紀錄，呢個係佢哋現時腦海中嘅目標。」
騎士球員吸食大麻？
處於劣勢嘅騎士再爆出醜聞，《ESPN》高級記者米克韋斯大爆，上仗賽後於騎士更衣室瀰漫濃烈大麻味，懷疑有人吸食大麻。米克韋斯於twitter留言：「騎士用嘅更衣室有好濃烈大麻味，不過呢度係加州（大麻合法化），落後0比2抽兩啖就可以紓緩痛楚。」由於留言旋即引起極大爭議，見勢色不對米克韋斯即刻補鑊，佢話冇證據指騎士球員喺更衣室吸食大麻，因為所有記者、攝影師同工作人員都可以入更衣室採訪，邊個吸食大麻真係冇人知。