占士醜爆輸波
騎士昨早於NBA總決賽Game1作客以91比113不敵勇士，「大帝」勒邦占士攻入28分，成為聯盟史上首位季後賽得分突破6,000分大關的球星，可惜他不但輸波，而且被杜蘭特及史堤芬居里的假動作呃到，目送對手大力入樽兼輕鬆射入三分，連美國傳媒都話「大帝」輸到冇晒面。
首位季後賽6000分先生
其實勒邦占士在東岸決賽Game5，已經打破「波神」米高佐敦的5,987分紀錄，不過能夠成為史上首位季後賽6,000分先生，自然更加威。今場占士交出28分、15個籃板同8次助攻的成績，個人季後賽得分累積至6,023分，隊友艾榮有24分、3個籃板同2次助攻，路夫亦有15分、21個籃板同1次助攻，可惜依然未能協助這支上季總冠軍球隊贏波。
畀KD居里假動作呃晒
輸波不特止，勒邦占士在防守方面更連環出醜，不但被杜蘭特（KD）的假動作呃到，失晒重心睇住對方飛身入樽，還試過被史堤芬居里假身玩謝，目送對方輕鬆射入三分，結果杜蘭特有38分、8個籃板同8次助攻，史堤芬居里則獲28分、6個籃板同10次助攻，帶領勇士於7場4勝制的總決賽先拔頭籌，Game2於香港時間6月5日早上8時上演。