4大英超勁旅7月攜手襲港 球迷請定假追星喇！

7‧19開波香港包辦2日激戰

兩年一度喺亞洲舉行嘅英超亞洲挑戰盃，最初原定今屆其中一個比賽日會喺上海進行，但據英國傳媒報道，因為上海方面賽期及場地傾唔掂，主辦單位決定將2日比賽都安排喺香港舉行。香港上次主辦英超亞洲挑戰盃係2013年，當年由3支英超球隊包括曼城、新特蘭及熱刺與東道主南華角逐錦標。有別過去幾屆賽事，今屆英超亞洲挑戰盃唔會有主隊獲邀參賽，取而代之係全英超代表，包括取得來屆歐聯入場券嘅利物浦、15／16球季神奇奪冠嘅李斯特城、今季聯賽排第10位嘅西布朗及有比利時國腳賓迪基壓陣嘅水晶宮，暫定賽期係7月19日及22日，有關詳情仍有待英超賽會正式公布。

紅軍友賽悉尼謝拉特落場

今夏訪港嘅利物浦，尋日喺澳洲同應屆澳職冠軍ＦＣ悉尼踢咗場友賽，雖然今場冇巴西球星菲臘比古天奴，但「神奇隊長」謝拉特同加歷查復出打正選，麥馬拿文、丹尼爾艾格就下半場後備上陣，吸引咗超過7萬2,000名球迷入場，久休復出嘅謝拉特風采依然，走上走落絕不錫身，結果紅軍憑史杜列治、艾拔圖摩蘭奴及羅拔圖法明奴上半場各入1粒大勝3比0，滿足當地粉絲。

至於利物浦成功攞到來季歐聯資格後，立即進行組軍工作，領隊高普為解決「龍門漏水」問題，據報想羅致36歲嘅西班牙門將卡斯拿斯加盟，《阿斯報》仲話呢名波圖門將已同利物浦簽咗一份加盟協議，轉戰英超事在必行。