港超聯重現盛世金球撲救公投預埋你！
今季港超聯已經喺上個星期六「煞科」，一向有睇開本地波嘅「波男」，梗係有同幾個老死入場見證冠軍誕生啦！雖然呢場波東網on.cc有直播，但正如佢哋其中一個評述、專做「替工」嘅「大頭」所講，睇波梗係親身入場睇先最過癮，所以一早善用咗足總嘅「貼心安排」預售，咁先唔使好似其中一個朋友嘅阿哥咁，去到球場先發現賣晒飛，無得入場。
煞科戰一票難求
朋友阿哥本來諗住幫襯旺角場門口嘅「黃牛黨」，係呀！大家無聽錯，本地波都有「黃牛黨」，原本賣80蚊嘅波飛，有人喺球場門口已160蚊放售，朋友阿哥只係諗咗一諗咋，炒「黃牛」位四眼哥已經成功放售，收工入埋場睇波。本地波都有咁嘅場面，「波男」曾經親眼見過記者同足總職員多過入場球迷嘅「港甲冰河時期」，所以都覺得好High，希望港超聯喺足總、各球會班主同球員、球迷同傳媒繼續努力下，可以愈搞愈好啦！
足總搞嘅「2016-17香港足球明星選舉」公眾投票期已經完咗，相信好多球迷朋友都已經投咗票，咁連續第二季由東網on.cc搞嘅「最佳金球」同「最佳撲救」網上公投，大家又投咗未呢？「波男」成日都講，無票無得講，有票唔係唔投嘛？喺「最佳金球」同「最佳撲救」各30個候選名單入邊，「波男」最Like「金球」就係G019陸志豪嘅遠射、G028中村祐人球世界級罰球，同G029「儍邦」球第一時間；至於「撲救」就撐咗S019嘅謝德謙同G029嘅基斯贊。
香港波，香港人無理由唔撐嘅，大家快啲去投票啦！唔知點投？去呢下面呢兩條link啦！
最佳金球︰https://goo.gl/9KY7z1
最佳撲救︰https://goo.gl/X5dhEl